فوزى وفوزية(رؤية لزواج ), ياترى إيه حكايتهم؟؟؟؟

بسم الله الرحمن الرحيم


في حياة كل فتاة و أنثى ملتزمة كانت أو غير ملتزمة .... رومانسية أو جادة في حياتها .....

لحظات ...



إذا أقدمت عليها بسؤال ذكي يناسب عن شخصيتها لتسألها عن الحب تعلو وجنتاها ... لمرأى تلك الفكرة تداعب خيالها ....

تكتفي فقط بأن يتقاذف فكرها لتلك الفكرة الرومانسية دون النظر لاحتمالية حدوث تبعات الحب

أم لا .....

الأنثى هي الأنثى سواء كانت عالمة ... طبيبة ... أو وزيرة أو قابعة ببيتها

عاطفتها غالبة عليها .... قد تحمل بين جنبات قلبها حباً رائعاً كبيراً غير موجهاً لأحد

لكنها تستشعره ... وتستشعر لذتهحتى ولو كان في انتظار الفائز به ...

يا لغبطتي !! لمن تحتفظ به لفارسها .. فهي تشعله وتؤججه لا لأحد سوى خيال لرجل فاضل تراه

بأحلامها بين الحين والحين ... وهي تسلمه إناء حبها الطازج الذي لم يطلع عليه أحد سواه

يا لحزني !! لمن أنهكت قوى تلك المشاعر بحملها لأكثر من رجل حتى ولو كان فكرة سمحت

لها بالسيطرة على نفسها ... دون علاقتها المباشرة معه ....

لكن نرجع نقول الأنثى هي الأنثى

إذا دق بابها .... إذا رن هاتفها لتزف لها صديقتها بشرى اختيار فارس لها ....

تجد نفسها ترتعش فرحاً لسماع ذلك .... فأياً كان هو ... حتى ولو لم تنطبق عليه مواصفاتها

إلا أن هناك من أعلن برغبته في جوارها .... مشاطرتها لحياته .... أماً لأبنائه .... استكمالاً لدينه

بها .... فلتسجدي لله شكراً حبيبتي .... على هبته لكِ .... يا لسعادتك حقاً !!

يا لجمال الحلال ....

هو وأسرته يأتيان لكي وبين أيديهم هدية لكي .... يخبراكي بها أنك درة مصونة

في عينيهم ترتفعين .... وفوق هديتهم تستحقين ....

يا لهناكي حين يؤلف ربك بين قلبيكما .... تجدي نفسك لا تكادي تفترقين عنه إلا وقد آلمك مرأى فراقه

ولو رأيتيه مراراً .....

حقاً .... آيات الله عظيمة وجليلة ....

صدقت يا ربي حين أخبرتها أنه منها وهي منه .....

ألا ترين هذا الحلال جميلاً فننتظره !! ألا تصدقيني أن غير ذلك لا يستحقك فتزهدينه ؟!!

تعالي معي نعيش فصول الحب فصلاً ... فصلاً ..... التي نقلتها لكي من إحدى الساحات

جزى الله خيراً كاتبتها خير الجزاء

-------------------------------------------------------------------
مع أختنا فوزية .... وأخونا فوزي ....


منقول

الاخ فوزى رايح يطلب ايد الانسة فوزية

تك تك تك (صوت الباب والعريس بيخبط بحونية)

ويهرول الحاج ابو فوزية ليفتح

فوزى السلام عليكم

الحاج وعليكم السلام يا بنى اتفضل اهلا وسهلا

يدخل فوزى ولنستعرض سريعا شكله

شاب مطحون لابس اللى على الحبل وملمع جزمته على نفس درجة لمعان صلعته

يجلس على طرف الكرسى فى خجل على افتراض ان فوزية اول بنوتة يطلب ايدها

تنظر ام فوزية من ورا الستارة وتقف خلفها فوزية ى لهفة متسائلة فى حياء مفقوس

حلو يا ماما

وتمصمص الام شفتيها واخدة اول ملاحظة على عريس الغفلة

مجبش حتى علبة شيكولاته جاى ايد ورا وايد قدام

وتكمل متصعبة يا عينى على بختك يا بنتى ده شكله بخيييل

وتنظر فوزية بخيبة امل لامها طيب شكله حلو يا ماما

(الشكل والحلم الازلى بالفارس العريض المنكبين

والبرونزى اللون سبب فى فشل مئات الزيجات)

فترد الام شكل ايه يا هبلة الراجل ما يعيبوش غير جيبه يالا عشان تدخلى العصير

وتدخل الام مرحبة والبنت وراها اهلا وسهلا يا استاذ خطوة عزيزة

واخينا يتوه ويرد بهمهمة غير مفهومة وعينيه على العروس المحرجة

اهلا يا طنط وبصوت خفيض ازيك يا انسة فوزية

فترد فوزية بهمس الحمد لله وقلبها يكاد يتوقف من الخجل والاضطراب

كفاية لحد كده ونوشوش فوزية بكلمتين وفوزى هو كمان

اولا لاااازم تلاحظى لبسه من اول النظارة لحد الشراب ولون هدومه

الملابس تدل دلالة كبيرة على الشخصية

واسلوب جلسة العريس يعنى قاعد على طرف الكرسى زى الاخ فوزى

يبقا ده لبخة وخام واعذريه لو عمل اى حركة قليلة الزوق لانه ببساطة غرقااان وغالبا سعادتك تجربته الاولى

لكن لو واحد قاعد براحته واول ما دخلتى قعد يبص بكل سماجة أنه من العيلة

فساعتها اخينا من النوع الصعب اللى شاف كتير ومش عاجبه حد

وكلمة للاخ فوزى اهل العروسة دائما يتكلفو فى وجود العريس ويجيبو جاتوه

وفاكهة ومهرجان اقل ما يجب عليك ذوقيا ان تدخل حاملا هدية ولو بسيطة ( صحيح ... خلي عندك دم يا

أخي) انا دلوقتى قسمت العرسان نوعين النوع الخجول اللبخة والنوع المحنك الوعر

ولى عودة لاخبركن فيها بنوعية الاسئلة التى توجه للنوعين

يعنى ممكن سؤال ينفع تسأليه لزيد ومينفعش لعبيد

و

و

واستنواالباقى

جزاكى الله كل خير

وبارك الله فيكى

وجعله فى ميزان حسناتك

الحلقة الثانية)


اه عروستنا السنيورة داخلة ورا والدتها وماسكة صينية العصير تطبيقا للتقاليد

وبعد السلام وتلك اللحظة التى شعرت فوزية انها دامت للابد لحظة بحلقة الاستاذ فوزى فى عروسه

تجرئت فوزية اخيرا وتقدمت منه لتقديم العصير

فوزية بصوت خفيض وهى تتخيل اسواء كوابيسها تتحقق والصينية تسقط على صلعة فوزى

لكنها
تفيق من تخيلها البشع على صوته الممتن تسلم ايديكى وتجلس فوزية بجوار
الحاج فوزى وقلبها يخفق بقوة تحمد الله فى سرها على مرور الخطوة الاولى
بسلام

الحاج ابو فوزية يبدأ الحديث منورنا يا بنى

فوزى ده نوركم يا عمى ربنا يخليك
ثم صمت مطبق

وصمت وصمت وصمت و صمت

فوزية فى سرها هو فى ايه ما تنطق يا بنى مستنى عزومة وزى فى سره انطق يا فوزى العروسة هتطير منك يالا هتقول عليك ممل ولخمة

ويتشجع فوزى بعد دقائق الصمت الرهيب وينظر للحاج ابو فوزية متسائلا

وهو الانسة فوزية فى سنة كااام؟؟

فيجيب الوالد باقلها سنة وتتخرج ان شاء الله

فوزية فى سرها ايه القرف ده ده حتى مش عايز يوجهلى كلام شاكلى معجبتوش

ويجد الحاج ابو فوزية انه لابد ان يتحدث هو فيسأله اسئلة من طراز

شغلك تخصصك عائلتك اى اسئلة مظهرها جاد والسلام

ويجيب فوزى اسئلة الحاج بجدية شديييدة عاقدا حاجبيه كأنه يجيب على اسئلة الثانوية العامة

كل هذا وفوزية تشعر بخليط من الملل والغيظ من اخينا الجد الذى يختلس لها النظرات اختلاسا

فوزية بلا نيلة الا ما فكر يوجهلى كلمة وكل ما الاقيه باصصلى وارفع عينى يقوم لافف وشه كأنه بيسرق

طيب ما بدهاش اما اشوف هو لابس ايه

ايه ده لابس شراب بيج على بنطلون كحلى وقميص ابيض ممم وايه كمان

بس بصراحة ربنا تقاطيعه مسمسمة اصلع حبتين اينعم بس مسمسم

لو كان بس يوجهلى كلمتين بدل ما هو طول الوقت موجه اهتمامه لبابا كأنه هيخطبه هو

ويتشجع فوزى للمرة الثانية منتهزا فرصة صمت فيها الاب ويوجه كلامه للانسة فوزية قائلا

وانتى اهتماماتك ايه يا انسة فوزية

ترتبك فوزية متسائلة فى سرها ايه الزنقة دى اقوله ايه ده

فترد الام لاحقة الموقف فوزية لهلوووبة فى المطبخ واهتماماتها الاولى شغل البيت



فوزى وقد تفاجا بالرد كويس والله بس....

انا قصدى اهتماماتك التانية يعنى بتقرى يعنى اى حاجة

فتجد فوزية انه لا مفر من الاجابة وبعد تفكير عميق تجاوب

بربى عصافير وسمك وحمام

فيرد والدها اه والله يا بنى دى مغلبانة بالهواية دى من زمان

من ساعة ما دخلت المدرسة وهى عمالة تجيب فى كتاكيت وقطط صغيرة من الشارع

ينظر لها فوزى ولاول مرة ينظر لها و يبتسم

فترد الام مستغلة الموقف اصل بنتى حنينة اوى وبتصعب عليها الحجات دى

وتستدرك بالمقولة الازلية مش شكرانية اكمنها بنتى لا والله هى فعلا حنينة وقلبها رهيف

ويتفائل فوزى بكلمات الام الله حنينة اشطة شكلها هى دى نصى التانى

وتشعر فوزية بعد الابتسامة التى حن بها عليها عريسنا فوزى ببعض الالفة معه


فوزية فى سرها ايه ده هو سألنى كذا مرة وانا قاعدة زى خبتها والله لاانا سألاااه

صبرك عليا يا فوزى
و
و



و


و

استنوا بقى

الحلقة الرابعة


واما عن فوزية فكانت فى عالم اخر وكادت تقوم لغرفتها لولا سماعها الاب والام يتحادثان بشأن فوزى

الاب والله شكله جدع ابن حلال ولا ايه رايك يا ام فوزية

والله يا ابو فوزية الواد ميتعيبش بس انا خايفة يطلع بخيل

لا لا احنا مش بنحكم عليه من اول مرة يا ام فوزية

طيب عموما اما يجى تانى هنشوف لو مجابش يبقا ضرورى بخيل

الام تفتكر البت عجبته؟ده منزلش عينه من عليها شكلها عجبته ولا ايه يا ابو فوزية

ويرى الاب فوزية تنسحب بدون كلمة فيسألها معاكسا

على فين يا عروسة

فتجيب محرجة ...اا داخلة انام

مش هتتعشى

مش جعانة تصبحو على خير

وتدخل عروستنا فى الدوامة الازلية التى تصيب كل فتاة بعد اللقاء الاول

وتجلس فى غرفتها وصوت الست يأتى من مذياع الجيران

هو العمر.... فى كام ليلة ....زى الليلة.... زى الليلة

وتسرح فوزية لترسم الصور وتعيش بيخيالها فيما تتوقع حدوثه
اجلس فى غرفتى ممسكة بكتاب موهمة نفسى انى اقرأه

وانا ابعد ما يكون عن حروفه وكلماته وتفكيرى كله هنااااك فى الصالة

امى وابى يجلسان هناك ويتحادثان عن موضوع القرن العرييييس

وبعدين يا ابو فوزى العريس ما اتصلش والنهاردة تالت يوم هى البت معجبتوش ولا ايه

يا ام فوزية الغايب حجته معاه ثم مش انا اللى قلتله يومين تلاتة وكلمنا

يعنى هو انت كان لازم تقوله يومين تلاتة اديه استحلاها واحنا على اعصابنا

يا ام فوزية صبرك بالله وان شاء الله يتصل ويا ستى كل شىء نصيب


يصلنى الحوار كاااملا وتلعب بعقلى الافكار ممكن فوزى يرفضنى انا فعلا معجبتوش

ومن وسط الافكار القاتمة والاحباط العام الذى شعرت به يطرق باب غرفتى طرقة اعرفها جيدا

ويتسحب اخى الصغير داخلا وغير منتظر لاذنى له بالدخول

نعم في ايه

انا بقرأ اخرج وسبنى فى حالى انا مصدعة

وبعد ان كان ينظر الى ويبتسم علت وجهه تكشيرة كبيييرة

كده طب والله ما انا قايلك ان العريث اتثل وبابا بيكلمه هاه

ويتحول وجهى 180درجة تجاهه وبصوت حنووون مين اللى اتصل يا مشمش؟؟؟؟؟؟؟؟؟

عريثك فوذى اللى راثه من غيرشعر

الحلقة الخامسة

وبقفزة وااحدة كنت امسك مقبض الباب واهم بالخروج لاعرف ماذا يحدث

واتوقف محرجة واعود ادراجى لاجلس على طرف سريرى فى قلق

وبعدييين اعمل ايه مش قادرة اخرج مكسوووفة جدا من نظراتهم وعايزة اعرف الاخبار اعمل ايييه

وبعد تفكير قررت ارسال مشمش فى مهمة استطلاعية واغريته بقطعة سكر نبات

ولكن وقبل خروج محمود كانت امى تدخل غرفتى حاملة الانباااء المنتظرة

وبما ان الست ام فوزية ست دوغرى فقد باغتتنى قائلة

مبروك يا بت العريس موافق وابوكى حدد معاه الجمعة الجاية عشان امه تيجى تشوفك

والله وكبرتى وبتتخطبى يا فافى

ويدخل الحاج فوزى فيرى الست ام فوزية بتشنهف وهى المرحلة التى تسبق البكاء والشحتفة

وحدى الله يا ام فوزى ليه بتعيطى دى حاجة تفرح

ثم مين قالك ان الست ام فوقية هتعجبها فوزية برضه احنا لسه عالبر اجلى العياط

فتنتبه امى المتشنهفة على كلمات الحاج فوزى فتنظر اليه شاهرة كل اسلحتها

نعم انت بتقول ايه انا بنتى متعجبهاش طيييييييييييييييب هنشووووف

هى كلمة بريئة خرجت سهو من فم ابى الطيب ولكن تبعاتها كانت رهييييبة

بداية من حالة المسح المسلح الذى قامت به الست ام فوزية للمنزل والستاير والنجف والشبابيك

وانتهاء بمسح ذرى للعروسة المنكوووبة فوزية

تدخل غرفتى على حين غرة وتفتح دولاب ملابسى وتقلبه رأسا على عقب وانا مش فاهمة حاااجة

هو فى ايه يا ماما بتدورى على حاجة؟؟؟؟؟؟؟؟؟؟؟

اه هو فين الطقم البمبا القصير بتاعك اللى بتلبسيه

اصدك اللى كنت بالبسه وبطلت عشان بتكسف من بابا والطقم قصير

ايوة هو ده قومى هاتيه من غير غلبة

واقوم لاحضاره بكل براااءة وانا مش فاهمة هى ايه اللى فكرها بيه

اهو يا ماما

ممم قيسيه بقا

طيب بس ليه

من غير سؤااال قسييييه

وارتدى الطقم القصير وانا برضه مش فاهمة حاجة لكن ابدأ فى القلق بتخططى لايه يا ام فوزية

وتطالعنى بأعجاب ايووووة تمام اوى اقلعيه بقا اما اغسله واكويه

نعم ليه يا ماما خييير هتدى لحد

لا عشان تلبسيه قدام الست ام فوقيه ان شاء الله

( طبعاً ادام أم فوزى فقط مش فوزى )

ناااااااااااااعم لااااااااااااااااا مش ممكن ده قصير وهاف كت مش هلبسه ابدااا


امال تقول بنخبى البرص ولا رجليكى عراقيب لا والله لاااازم تعرف انك فل

فى سرى اتسائل اى منطق عجيب تفكر به امى وتضحى بشعورى بالخجل

وطبعا لانى مطيعة جدا لامى واكره اغضابها رضخت تحت حكم القوى العليا

ولم تنتهى افكار الست الوالدة عند هذا الحد بل تطوووور الامر تنزل للعطار وتعود

يا بت يا فافى تعالى هناااا

اسمع صوت امى من غرفتى فأخرج مستطلعة نعم يا ماما انتى جيتى من برة

اه خدى وتناولنى كيس به زهرات صغيرة جافة واضح انها اعشاب من عند العطار

وقبل ان اسأل تخبرنى امسكى دى زهرة البابونج

اعمل بيها ايه يا ماما ؟؟

حتغليها فى مية وتحطى وشك فى الحلة عشان بخارها يحمر خدودك

انا معنديش بنات يحطو مكياج لازم تعرف ان خدودك تفاااحى طبيعى

يا ماما حلة ايه اللى هحط فيها وشى انا هحط حبة بودرة والسلاااام

اسمعى الكلام يا فافى دى وصفة عمك حسنين العطار واللى اقوله تنفذيه

اقف صاااغرة وعلى وشك الانفجار ورأسى فى حلة البابونج يوم الجمعة مساء

مرتدية الطقم الفاااضح والصندل ابو كعب اللى بكرهه واسمع جرس الباب

رووح افتح يا ابو فوزية الجماعة وصلووو

و

و

..................

الحلقة السادسة

كنا واقفين فين؟؟

اه عروستنا المنكوبة فوزية واقفة فى المطبخ ووشها فى حلة البابونج

والعريس المبجل فوزى طرق الباب ويهرول الحاج ابو فوزية ليفتح

السلام عليكم

وعليكم السلاااام اهلا يا بنى اتفضل يا اهلا بالست ام فوقية

وتقبل ام فوزية من الداخل مرحبة اهلا وسهلا خطوة عزيزة يا ست ام فوقية

وبطرف عينها تلمح علبة مربعة يحملها فوزى فتلتفت له مرحبة وعلى وجهها ابتسامة من الودن للودن

اهلاا يا بنى اتفضل يا الف خطوة عزيزة بالست ام فوقية اتفضلووووو

وبعد ان تجلس الست ام فوقية فى الصالون لتلتقط انفاسها

تبادرها ام فوزية قائلة اتفضلى فى المجلس عن اذنك يا فوزى يا بنى

وبعد ان تستقر ام فوقية فى المجلس تسرع امى الى فى غرفتى وانا اقف وراء بابى اتسمع

ما يحدث

يالا يا فوزية دخلى الشربات

ولا تنسى ان تستدرك اللهم صلى على النبى قمر يا فافى طالعة لامك

على فكرة يا بت العريس جاب هدية والحمد لله ربنا خيب ظنى

واسألها وقلبى يرتجف شكلها طيب ولا ايه يا ماما

متخافيش يا فافى بس اهم حاجة متكلميش كتير واضحكى من غير ما تفتحى بقك

ايه يا ماما ده

طيب حاضر اللى تشوفيه يا ماما

طيب يالااا واقفة بتعملى ايه واسير خلفها متمنية ان تنتهى هذه المقابلة سريييعا

واحمل كوب الشربات الازلى داخلة فى ثانى اختبار للتوازن

وادخل وعيناى على الكوب الذى لا استبعد ان يسقط الاااان واشعر اننى اقابلها من غيير هدووم

وطبعا مع شعوور المراقبة الرهييب وتلك المراة تطالعنى من اطراف شعرى لاخمص قدمى

وتبدا فى الكلام بسم الله ما شاء الله الله اكبر ربنا يخاليهالك يا ست ام فوزية

اهلا يا فافى ازيك

اهلا يا طنط وتمد يدها لتسلم على وتقبلنى قبل ما تاخد الكباية منى وانا خلاااص موقنة انها هتقع عليها

والحمد لله تهدا بعد نوبة التقبيل والسلام الرهيبة وتمد يدها منقذة اياى وتتناول الكوب

وتجلسنى بجوارها وتبدأ فى الكلااااام

والله يا ست ام فوزية ولا ليكى عليا يمين فوزى ابنى من احسن ولادى ودايما داعياله

فترد امى ربنا يخليهولك يا ست ام فوقية

يااارب وافرح بيه قريب ان شاء الله

وتنظر الى قائلة وانتى يا فوزية اخبار المزاكرة ايه

وقبل ان اجيب ترد امى عليها ماشاء الله فوزية متفوقة من يومها وعمرها ما غلبتنى

وتفتح امى فى نوبة من المدح كأنها ترد الصاع صاعين لام فوقية والبادى اظلم

والله يا ست ام فوقية فوزية اديا ورجليا فى البيت مبتخلينيش اعمل حاجة

عارفة دى هى اللى عاملالكو البسبوسة النهاردة قالتلى يا ماما انا عايزة ادوق طنط

فى سرى متسائلة عن مصدر الكلاام العجيب الذى تقوله امى الان

هل كونى عجنت البسبوسة بالزبادى معناه انى عملتها ثم انا مقلتش ادوق طنط دى

وكلما مدحت امى فى وبااالغت فى وصف عبقريتى المطبخية الفذة

رفعت الست ام فوقية يدها مربتة على ظهرى وشعرى التى اصرت امى على فرده

اجلس بجوار تلك المراة متقمصة دور ام الشعور اضعة عيناى فى الارض

متسائلة اى تجربة تلك التى اخوضها الان متمنية من كل قلبى ان استيقظ من هذا الكابوس

وبعد ان هدأت نوبة المدح الرهيييبة التى شنتها امى منذ قليل

بدات نوبة اخرى شنتها الست ام فوقية وانا قاعدة بينهم بأسلوب جعلوه فانجعل

عارفة يا ست ام فوزية فوزى ابنى حنين جداا عليا لدرجة انه لو لقانى بغسل المواعين

يقولى عنك يا ماما ويغسلهم هو واكتر واحد فى خواته مراضينى ربنا يفرحنى بيه قريب وبعد كمية المدح اللا

نهائى الذى يصف طيبته وجدعنته وحنيته وعبقريته الفذة قالت خاتمة كل هذا ما تيجو نخرج نقعد معاهم اصل فوزى موصينى مخدش القعدة كلها

اه وماله يا ست ام فوقية نقوم يالا يا فوزية روحى البسى حجابك وعبايتك

وبامر الست الوالدة اقوم متنفسة الصعدااء لانتهاء نصف المقابلة

وادخل غرفتى واغلق الباب واقف متسمرة وقلبى يرتجف من جديد

فوزى يتردد الاسم بداخلى واشعر بفرحة غرييبة لانى سأقابله الان

وارتدى حجابى سريييعا وبداخلى شعور متناقض بين ان اركض للقااائه او اهرب من هذا اللقاء

اضطراب ومشاعر عجيبة الشكل وفى النهاية اطلب من عقلى هدنة امتنع خلاالها عن التفكير

وتأتى امى يالا يا فافى بتعملى ايه الناس مستنية وترحمنى امى من تقديم المشروب وتحمل الصينية نيابة عنى

اسير خلفها ولا اشعر بشىء حتى ادخل وهناك يقف فوزى بمجرد رؤيتى

و

يبتسم ........اشعر بالزمن يتوقف ما هذه الابتسامة الجديدة انا لم ارها قبلاا

كفرحة اللقاء بعد غياب داااااااام لا بل كفرحة العيد نفسه

يقف هناك وفقط يبتسم وتذهلنى نفسى فى تلك اللحظة اننى ايضا ابتسم

وتمر اللحظة العجيبة على الجميع ولكنها لاتمر فى زمنى تقف هناك معلقة واجلس امامه وللمرة الاولى اشعر بأننى اعرف هذا الشخص قبلا

ويمر اللقاء خفيفا ونتبادل كلمات بسيطة ولكنها كانت كل ما نحتاج اليه

واغلب الجلسة كانت الست ام فوقية هى المتحدثة الوحيدة

وانا وفوزى نتبادل النظرات خلسة

و
و
و
و
و
ونبتسم

وانا فى قمة تفاجئى وخجلى ايوة:

ازيك يا انسة فوزية عرفتى انا مين..

اا اا يوة

انا قلت اتصل اسال عليكم واكلم الوالد هو موجود؟؟

هو نايم .... اصحيه؟؟

لالا ملوش لزوم انا هكلمه بعدين ..وكفاية انى سمعت صوتكم

لا تعلييييق من ناحيتى ...

طيب سلامو عليكم

وعليكم السلام

لماذا يتصل كان هنا بالامس فقط هل حقا يحبنى هذا الفوزى

وهل احبه انا ... هل يستحق الامر العناء ...ما هذه الحيرة يااارب اخبرنى ماذا افعل

واقوم من جلستى الحائرة واتوضأ واصلى ركعتين اصليهما كلما اعيتنى الحيل

ركعتين حاجة الى الله لا اعتقد ان الفتاة قد تحتاج احد اخر غير الله فى هذا الوقت وفى كل وقت

ويمر اليوم وفى اليوم التالى ياتينى هذا الخبر....







اجلس فى غرفتى ممسكة بمسبحتى كلما سبحت واستغفرت كلما وجدت نفسى اهدأ ويزول توترى بالتدريج

وافكر فى مكالمته وصوته وكلام امى وابى لماذا كل هذا الخوف يا نفسى


ماذا سيحدث اذا وافقت على العقد وارضيت امى وعم الفرح على اسرتى

هذا الفوزى يخيل الى انه طيب ولن يؤذينى

ماذا يستعجل العقد واخافه انا

ايه اللى بتفكرى فيه ده يا فوزية اكيد اتجننتى

هو مش هيخسر حاجة ولو سابنى فى يوم مش هيبقى عليه اى حرج ولو راح لواحدة بعدى مش هترفضه

اما لو كتبت الكتاب وسابنى ساعتها انا اللى هاخد اللقب الذى اكرهه ويرعبنى ويرفضه مجتمعى لقب (مطلقة)

لاااا انا مش هقعد هنا افكر واعذب نفسى انا هخرج احط النقط على الحروف مع بابا هو هيفهمنى

واخرج من غرفتى مدفوعة برغبة قوية فى التمسك بموقفى

وادخل غرفة امى وابى فأجدهما يتحدثان بصوت خفيض وعلى وجههما نظرة ارعبتنى

اعرفهما جيدا ما معنى هذه النظرة ما الخبر.......؟

لذيذه شكرا

فى وسط حديقة من الجورى أقف وحولى طيور ملونة الاجنحة وشلال ماء منساب ومن وسط سكينتى تلك يأتينى صوت ينادينى

التفت للوراء فأجد عينان اعرفهما جيدا تطالعانى بحنان ويبتسم...
وابتسم....ويمد لى يديه بزهرة فآخذها منه بفرحة كانت فى خيالى فقط ...

فافى فافى فاااااااااااااااااااااافى اصحى كل ده نوم يالا عشان تجهزى الجماعة جايين العصر

وافيق من حلمى الجميل على صوت الست الوالدة فهى متخصصة دائما فى ايقاظى من احلى الاحلام

وانهض من فراشى متثاقلة افكر لو كان الحلم يطول قليلا وذلك الشعور بالخوف يعود لينساب بداخلى من جديد...

كيف سأتمكن من البقاء ثابتة على الكرسى ووجوه اعمامه واخواله تحدق فىّ هذا بالاضافة لعيناه هو تحدقان بى ...وما أدراكم ما عيناه ..

كيف سأمنع نفسى من الهروب ركضا لغرفتى والتسمر على الكرسى فى موقف كهذا...

وافوض امرى الى الله واقوم لاداء المهمات الشاقة المؤبدة مع والدتى
استعدادا للمقابلة ابتداء بتحضير العصير ومرورا بتنسيق المجلس ووضع البخور

وانتهاء بتغطيس وجهى فى حلة البابونج الازلية ويأتى وقت العصر واركض مسرعة لاداء الصلاة وارتداء ملابسى..

ويرن جرس الباب ويسرع ابى ليستقبلهم وانا اقف خلف الباب اتسمع وقع اقدامهم لعلى اعرف كم عددهم!!

واتلو المعوذتين واية الكرسى وتطلبنى امى وادخل المجلس غير متوقعة للعدد المهول من العيون الذى يطالعنى فى فضول!!

وفى سرى أقول : منك لله يا فوزى جايبلى عيلتك كلها تتفرج عليا كل دى عييييييلة

وبعد السلامات وكل هذا جلست بجوار ابى وكان الاتفاق بينى وبينه على ان اجلس قليلا فقط

ومتى بدأ الحديث عن الاتفاقات المادية وما الى ذلك فالاسئذن بالمغادرة
واخرج فكما اخبرنى ابى : عيب البنت تكون قاعدة فى جلسة الاتفاقات

وطبعا هذا امر اراحنى كثيرا فلن يكون امرا طبيعيا ان اجلس لاسمع فوزى يقول: عشرة مهر

وابى يرد: والله ابدا خمستاشر

فيرد عمه: عليا بحداشر

وكانهم فى المزاد العلنى يتشاجرون على شراء تحفة ما

ومن وسط جلستى وافكارى الطفولية تلك ونظراتى التى لم اجرؤ على رفعها ولا مرة اسمع من يقول..

ازيك يا انسة فوزية

وارفع عينى لمصدر الصوت فأجده فوزى يطالعنى ويبتسم

كم اصبح جريئا هذا الفوزى يسالنى ويبدأ الكلام امام اهله كلهم

واجيبه والكلمات تقف فى حلقى االحمد لله..

ويطالعنى احد الرجال الجالسين وكان فى الخمسين من عمره تقريبا ويظهر عليه الوقار والصلاح ويسالنى انتى فى سنة كام يا بنتى

فيجيب ابى فى البكالوريوس السنة دى ان شاء الله

بسم الله ماشاء الله شدى حيلك يا بنتى هانت

ان شاء الله يا عمو
وبعد ان قدمت امى العصير وانا اشعر بخجلى يتضاعف وبالوجوه لاتكف عن الحملقة فى وجهى وبدرجة حرارتى قاربت الغليان

اخييييرا بدأ الرجل الوقور فى الحديث قائلا.... ها طلباتك يا بو فوزية



وكانت كلمة الخلاااااص لى حيث وقفت من فورى واستأذنت فى المغادرة

اتفضلى يا بنتى فرصة سعيدة

انا الاسعد ياعمو ...

واغادر مسرعة لغرفتى بدون حتى ان اتمكن من الحصول على نظرة اخيرة من...فوزى

وادخل غرفتى متنفسة الصعداء واتشاغل بتبديل ثيابى وامنع نفسى من الخروج لتسمع ما يقولون

مش عايزة اعرف ومش مهم لو فوزى زعل انى مش موافقة على كتب الكتاب ومش مهم لو اتخانقوا والجوازة باظت

ولاااااايهمنى

وتتردد مخاوفى بداخلى وادعو الله من كل قلبى الا تتحقق ايا منها...

وتنتهى المقابلة ويغادرون بعد ثلااااث ساعات كاملة مرو على كأنهم دهرا

واخرج مسرررعة لاسأل ابى ها يابابا اتفقتوا؟؟

وكعادة امى لاتجد مناسبة لاحراجى الا واستغلتها فترد شوف يا خويا البت يا بت اكسفى وميبقاش وشك مكشوف كده

ده منظر عروووسة

ويسعفنى ابى الحبيب ويرد بس يا ام فوزية متحرجيهاش مش هى اللى هتجوز برضه تعالى يا عروسة اقعدى جمبى

ويزيد خجلى من كلمة ابى الاخيرة وتلقيبه لى بالعروسة واجلس بجواره منتظرة ما سيقول بفااارغ صبر

بصراحة يا فافى فوزى طلع بنى ادم نبيل ومحترم وشارى بجد واحنا مختلفناش على حاجة

اتنفس الصعداء واشعر بسعادة تجتاحنى واقاوم نفسى لئلا تلاحظ امى فتسمعنى من كلماتها اللاذعة

يعنى وافق على الخطوبة يا بابا

والله يا فافى هو طبعا زعل حبة انك مش موافقة على كتب الكتاب بس قال براحتها

وبصراحة صمم انه يجيب شبكة فى الخطوبة ومرضاش بدبلتين فعلا حسيت انه شاريكى

وتنتهز امى الفرصة للهجوم على شايفة الواد ابن حلال قد ايه مش مخون ولا حاجة

كان ممكن يقول اه بنتهم مش شاريانى كفاية عليها دبلتين بدل ما تاخد الشبكة وتسيبنى بعدها بس طلع ابن اصول ربنا يحميه

واغادر لغرفتى سعيييدة وراضية لابعد حد وانظر من نافذتى للسماء شكرا لك ياالله كم انت كريم معى

وانام ليلتى تلك متمنية ان اراه........ فى حلمى من جديد








تم التنسيق بين ابى وفوزى على ان يأتى لزيارتى يومين فى الاسبوع

نظرا لبدء الدراسة وازدحام جدولى لذلك فقد حرصت امى على جعل اليومين رمز مقدس لا اذهب فيهما لاى

مكان واتفرغ للاكل تحسين صحتى المجهدة بسبب المحاضرات و...لتغطيس وجهى فى حلة البابونج

وبصراحة لقد كنت انتظر الاثنين والجمعة بصبر نافذ كم تغير هذا الفوزى كلما جائنى يوما كلما عرفت فيه

خلقا جديدا منذ يومين كان هنا وسألته فجأة اى اكلة تفضل؟؟ طبعا والداى لم يكونا معنا انهم وبعد جهد

سمحو لى بالجلوس معه فى حدود النصف ساعة بمفردنا و حين سألته عن اكلته المفضلة ابتسم قال بمرح

رز بالبلح اول مرة اعرف ان هناك اكلة بهذا الاسم واتسائل فى سرى كيف تكون اكلته المفضلة بهذه

الدسامة ووزنه قليييل هكذا واحاول جاهدة الا يظهر على انى لا اعرف هذه الاكلة وقد عزمت بداخلى ان اول

ما سأفعله بعد انتهاء المقابلة هو سؤال الست ام فوزية عن هذه الاكلة ويخرجنى فوزى من حالة السرحان

المسيطرة على بسبب هذا الرز بالبلح وانتى يا فوزية اكلتك المفضلة ايه؟؟

فاجيب ام على .......تعرفها

فيجيبنى وابتسامته عرييييضة طبعاااااااااااااا انا بحبها جدااااا

ويكمل بتعرفى تعمليها يا فوزية

واجيبه بأعتزاااز طبعاااا

واكمل فى سرى ام على فقط هى كل ما اتقن من الحلويات

لماذا صارت لقاءاتنا تمر كالبرق ...واتمنى لو كانت اطول

ويغادر وقلبى يغادر معه ويمر الشهر بسرررعة البرق ونحدد ميعادا لشراء الشبكة وطبعا كدأب تقاليدنا العزيزة

لااااازم اهل العروسة كلهم يروحو معاها واللى متعزيمهوش تبقا مبتحبوووش

وتتصل امى بخالاتى وعماتى وكل اقارب الدرجة الثانية بلا استثناء

وفوزى ايضا لم يتأخر فأحضر اسرته كااااملة واخواته البنات ايضا

ارتدى ثيابى وبيتنا يعج بالسيدات اقاربنا وكلهم يرفع شعار اللى يحب العروسة يفاصل

ايوة يفااااصل كل من طلبتهم امى للحضور كان لعلمهم باسواق الذهب و كانت المرة الاولى التى

اعرف انه حتى الذهب يفاصلون فيه

كنا ثلاثة عشر شخصا انا وامى وابى وخالتاى وعماتى الثلاث وفوزى واختيه وامه

وانحشرنا حشرا فى سيارتين سيارة خطيبى المبجل فوزى وسيارة ابى وجاء قدرى ان اجلس

بجوار اقصد اسفل احدى عماتى

كدت اتلاشى بتلك الجلسة وعماتى يشيرون على ابى بالطريق المؤدى لسوق الذهب

وانا اجلس محشورة وتجثم عمتى على نصفى الايمن وتكاد روحى تخرج وفى سرى يااااااااااارب

نوصل قبل ما اتفعص

هدومى المكوية عليه العوض فيها هدخل محل الدهب وشكلى عروسة كانت راكبة اتوبيييس يا لطيف الطف بيا

وتمنيت لحظتها لو كنت ركبت فى سيارة فوزى لماذا اصرت امى على ذهاب خالتاى لتركبان معه

ونظرت لى نظرة من اياهم تعنى عيييب انتى لسه مش تبعه ولاول مرة اتمنى انى اكون تبعه

ونصل بسلاااامة الله وندخل محلا كبيرا هناك وانظر حولى يا الله ما هذه الاطنان من الحلى والاطقم

وفجأة خطر ببالى امر مهم

انا لم افكر قبلا ماذا اريد كشبكة ولم يخطر ببالى نوع معين من الحلى تمنيته لى بل على العكس كنت دائما امقت الذهب

ولا ارتديه الا فى المناسبات وتحت الحاح الست الوالدة ونظريتها الازلية يا بت يقولو بنت عز

ومتسيغة ارتديه صاغرة

ولكن لماذا اشعر بأننى سأحب اى حلية يحضرها لى فوزى وكما اخبرنى ابى فانهم لم يحددوا مبلغا معينا

لشراء الشبكة

قال له ابى يا بنى هات قيمتك وقيميتها دى هدية منك لعروستك مش هحددها انا

كلنا واقفين فى المحل والافكار تتخاطفنى وفى لحظة افيق فاجد فوزى يقف بجوارى ويسالنى اخترتى

حاجة يا انسة فوزية

لقد اصبح ينادينى باسمى المجرد فقط حين نكون بمفردنا اما امام ابى فهو لازال يخلع على لقب انسة

ونظرت حولى واجبته مبتسمة ...مش عارفة واكمل وقد جمحت بجرئتى ..اختار معايا

ولا ادرى لماذا شعرت بكلماتى الاخيرة اسعدته جداا فقد اتسعت ابتسامته جداااا

ونظر لرف من الارفف وقال ايه رايك فى الطقم ده وحقا كان ما اشار اليه طقما جميلا من الذهب الايطالى

وهو معروف بلمعته

وهو تقريبا كل ما اعرف من خامات الذهب ويذهب صاحب المحل وينزل الطقم لنا كان جميلا فعلا هذا

الفوزى صاحب ذوق رفيع

ويلتف من حولى الجميع ينظرونه ويسالون سؤالا واحدا هااا عاجبك يا فافى

فأجيبهم ...ااحلو طيب على خيرة الله هكذا يجيب فوزى ولم اره من قبل سعيدا هكذا

وانا كل هذا معتقدة ان المهمة انتهت ولكن يفاجئنى فوزى ها هتاخدى ايه كمان

واتفاجأ بحق من سؤاله ولا اعرف بماذا اجيب وانظر لامى فأجدها تحمل نظرة عادى مستغربة ليه

هو لسه جاب حاااجة

فانظر لفوزى ثانية واجيب نفس الاجابة معرفش اا

وللمرة الثانية يشير فوزى الى رف من الرفوف ملىء بالغوايش وينزل لنا الرجل صفا عريييضا منها

وتلفت نظرى نقشة رقيقة جدا لغويشة تبدو اشبه بالسوار وانظر لفوزى متسائلة ايه رأيك

فتجيبنى نظراته الراضية عن اختيار موفق وذوق متحد واسعد بهذا كثييرا مثله تماما

وبعد اختيار الدبلة ودفع الفاتورة الباهظة والفصااال المستميت من قبل عماتى وخالاتى دفع فوزى مبلغا

كبييرا فى نظرى ولكن خرج سعيد جدا مثلى تماما

وعدت للمنزل ومعى الشبكة التى اصر فوزى ان تبقى معى ليوم الخطوبة رغم ان هذا مخالفا للتقاليد

ولكنه اثبت لى بحق انه كريييم جدا

فارس احلامى بحق


ويأتى العزيز فوزى فى اخر لقاء لنا قبل يوم الخطوبة وتنتهى التجهيزات واحصل على فستانى

وكان لقائى الاخير معه قبل الخطوبة ليس ككل لقاء

هذه المرة كان ابى مصابا بالبرد وصلى المغرب فى المنزل وبقى فوزى ليصلى جماعة معه و.....سمعت صوته

وهو يتلو القران

طار قلبى فرحا بصوته الخاشع الجمييييل المرتل يا الله اعطيتنى ما طلبت وزيادة

كيف سانسى يوما هذه اللحظات النورانية وهذا الصوت.... سأكون فخورة بحق لو انتسبت لصاحبه يوما.....

وبت ليلتى افكر كم انا محظووووظة

ايتها الايام مرى سريعا حتى اكون معه......للابد





نااااازلة السلالم يا ماشا الله عليها

فوزية هانم وفوزى فى اديهاااا

واسير بأتجاه خطيبى المبتسم ابتسامة اظهرت لوزتيه


واحاول جاهدة ان احافظ على توازنى لكى لا اسقط بسبب الحذاء عالى الكعبين والذى اصرت امى على شراءه

لمجرد انه بلون فستانى

و........تك تك تك

ويدخل محمود اخى الاصغر ليخرجنى من تصوراتى القلقة ومن المرات النادرة التى افرح بقدومه لاخراجى

من هذه الافكار

والغريب انه يقرع الباب بهدوء ويدخل حانى الراس بطريقة جعلتنى انتبه له بشكل كامل

تعالى يا مشمش مالك زعلان ليييية؟

فيأتى الى ويجلس بجوارى صامتا ثم....

فافى انتى ثحيح هتمشى وتثيبينا

ليه بتقول كده يامشمش انا مقدرش اسيبك ابدااااا

و افكر بداخلى ان هذا المشمش كان فى حجرى منذ ولادته لم افارقه لحظة

وما يذهلنى نظرة الحزن والدموع التى توشك بالهطول من عينيه ويقول

انا مبحبش فوذى ده ماليش دعوة متروحيش معاه وتثيبينى

هو هياخدك لييييه انتى بتاعتنا مش بتاعته ماما بتقول انك هتمشى اهىء اهىء

وامام دموع العزيز الصغير تهددنى دموعى بالانفجار واحتضنه غير قادرة على قول شىء له

ويتشبث بى بكلتا يديه واشعر للمرة الاولى ب.......تهديد الفراق

انا لم اعتقد اننى ساخاف الرحيل منذ الان انا لازال امامى عام كامل معهم لن ارحل غدا غدا فقط ستتم خطبتى رسميا

وتدخل امى فترانى محتضنة اخى الصغير ودموعى تنساب فى صمت


ورغم انى اعتقدتها ستسمعنى من كلماتها اللاذعة الا انها طالعتنا فى صمت واخذت شيئا من غرفتى وخرجت بهدوء

وفى المساء رأيتها تصلى فى غرفتها وتبكى .....

كم هى غريبة هذه الايام كيف كانت امى تخبرنى دائما بأن حلمها ان اتزوج لترتاااح منى

هى الان اراها هكذا

واما ابى فحقا كان سعيدا وظل طوال اليوم يمازحنى ويلقبنى بالعروس وامى تبتسم فى صمت

وفى المساء كان كل شىء جاهزا فستانى الفضفاض الوردى اللون وحذائى عالى الكعبين والذى يمثل اسوأ كوابيسى

وطرحتى الكبييييرة والوردية اللون ايضا والجونتى تحسبا فى حالة اصر والداه على ان يلبسنى الشبكة بنفسه

كل شىء جاهز ما عدا ..............انا

لست اشعر بأنى جاهزة ابدااا انا اموت رعبا من مجرد التفكير فى ان الكل سيأتى

غدا فقط ليتفحصنى

كلهم سيمطروننى بوااابل النظرات والتعقيبات وانا استمتعت طيلة حياتى بكونى الفتاة المتخفية

فلا اجمل عندى من ليلة يغادر فيها ابواى لقضاء السهرة عند جدتى واجلس انا وحدى اقرأ

اكره اللقائات الاجتماعية واعشق الجلوس وحدى فى هدووووء فلا يستهوينى الصخب بأى حال

واتسائل كيف ساكون غدا فى قلب الصخب والجميع يراقبون حركاتى وسكناتى

و اتعب من كثرة تفكيرى وافوض امرى الى الله اولا واخيرا واذهب للنوم

واستيقظ لصلاة الفجر ويجافينى النوم بعدها فأجلس لاذكر الله فى شرفتى واحاول جاهدة ان اتخلص من توترى

يمر الوقت بى وانا اذكر الله واتلو ما تيسر لى من القران واشعر بسكينة تجتاحنى وتفاؤلا عجبت من اين اتى

وما ان دقت الساعة التاسعة حتى كان جرس الباب يدق وكانت عائلتى الكريمة اغلبها هنا

خالاتى وعماتى وبناتهن اتى الجميع ليساعدن فى التحضير للعشاء الكبيييييير

وفى لحظة تحول منزلنا الهادىء الى .....فرح

فاول شىء فعلته عمتى اطلقت زغرودة طوييييلة على باب المنزل ايقظت الحى بأكمله

وتبعتها خالتى وبناتها استيقظ ابواى على كل هذا وبدأ العمل فووورا

يمر النهار وتوشك الشمس على المغيب وعماتى وامى منشغلات بالمطبخ والتحضير للوليمة

فكما رتب والداى سيتناول العريس واهله طعام العشاء معنا بعد ان ارتدى الشبكة

وحتى طعام الغداء تناولته امى وعماتى فى المطبخ وتناولته انا بصعوبة باالغة

لانى كنت اعانى من تلاااال الماسكات المتلاحقة والتى تفننت ابنة خالتى فى وضعها على وجهى واحدة تلو الاخرى

ويؤذن العصر وتبدا حالة استعدادات قصوى فى منزلنا فأذهب للاغتسال وتبدأ امى وخالاتى وعماتى فى تجهيز المكان

ويهرع عمى لشراء الزهور وتنسيقها فى بيتنا كله ابتداء من باب المنزل وانتهاء بغرفة الاستقبال والتى صارت

حديقة مليئة بالزهور

ويقترب وقت المغرب واقوم لارتداء فستانى وطرحتى وبنات خالاتى حولى يصفقن وينشدن وانا ...لست معهم

انا هناك فى عالم اخر واشعر بأننى اطالعهم من خلال شاشة صغيرة لا اصدق ما يحدث لى انا عرووووس

ويؤذن المغرب واصلى وادعو كثيييرا ياارب كلل هذه الليلة بالنجاح واعنى على الظهور بشكل لائق

وما ان انتهى من الصلاة حتى اسمع صوت البوق المميز لسيارة مزينة تحمل بداخلها ......فوزى

وتتسارع دقات قلبى ومع الاصوات التى اسمعها خارجا زغاريد متلاحقة من قبل اهله على سلم منزلنا

وعلى باب شقتنا

ويدخلون جميعا وتمر اللحظات سريعة خاطفة وانا متوقفة مع زمنى يفصلنى عنه.....جدار

منتظرة مرافقة ابى لى لاخرج .....اليه

ويدخل ابى واتشبث بيده وارى فى عينيه نظرة اعجاب وفخر فأنا ابنته العروس التى رفضت وضع اى زينة

على وجهها واكتفت بحمرة خجلها وكم شعرت ان هذا اسعده وارضاه عنى وخرجنا.....

ورفعت عيناى ابحث عن .....فارسى لماذا اليوم اشعر انه صار ينتمى لى بشكل ما

واصطدم بعينيه الخجولتين والتى تضخان الفرح ضخا ووجهه الذى تشوبه الحمرة واول من قام واقفا

ساعة دخولى....

وعينانا متلاقيتان فى لحظة نقشتها فى تاريخى ....

ايتها اللحظة .....من فضلك دومى للابد

وفى يوم اعود من محاضراتى متعبة واشعر بحرارتى مرتفعة فادخل غرفتى بهدوء لئلا تلاحظ امى

فأنا اكره ان اقلقها على

واخلع ثيابى بصعوبة وانام وتدخل امى فأخبرها بانى اكلت مع صديقاتى ولا اشعر بالجوع فتغلق النور وتتركنى

وانام نومة قلقة الى المساء والرعشة تسرى فى جسدى والعرق يتصبب منى وتدخل امى فى الليل

وقد اقلقها نومى المتواصل

فافى قومى يا بنتى كل ده نوم المغرب اذن من بدرى انتى عيانة ولا مالك وتضع يدها على

و.........كالمعتاد

يالهوى الحقنى يا بو فااافى البت سخنة مولعة

واستيقظ على سيمفونية الندب وجملها التى على غرار

اكيد دى عين ام سوسو عشان بنتى اتخطبت وبنتها لسه

واقوم متثاقلة لاهدىء من روع والدتى واخبرها انى بخير

اهو يا ماما هقوم اصلى المغرب انا كويسة صدقينى واقوم من فراشى لاثبت لها انى تمام ومش عيانة ثم ............

اسقط مغشيا على

يااااااااااااااالهوى

ترسلها امى بالصوت الحيانى ويأتى ابى الغالى مفزوعا ويبدا محمود الصغير فى البكاء

ويحملنى ابى للسرير وتركض امى لتحضر زجاجة كولونيا وابى ليحضر الطبيب والهاتف يرن

وطبعا لاحياة لمن تنادى فأهل الدار منشغلون بى ولن يجيب احد وينقطع ويرن مرة اخرى

حتى رفعه اخى محمود وكان المتحدث فوزى

اعتاد على ان يطلبنى بعد عودتى من المحاضرات واليوم اتصل مرتين وفى كل مرة كانت امى تخبره بأنى نائمة

وحين لم يجب احدا على الهاتف مساء كاد ان يجن وارتدى ثيابه متأهبا لياتى الينا لانه شعر بالقلق

و كمحاولة اخيرة اتصل مجددا وهذه المرة اجاب اخى محمود

السلام عليكم يا محمود .........اين فوزية ؟؟

فافى وقعت على الارض وبابا جابلها عمو الدكتور.... هتاخد حقنة

وعند هذا الحد ترك فوزى سماعة الهاتف وخرج من داره مسرعاااا

افيق من اغمائتى على صوت امى الحبيبة او لنقل على نحيبها وابى يقف عند رأسى والطبيب يقيس النبض

ثم يغادر بعد ان يكتب العلاج ويطلب منى عدم مغادرة السرير لاسبوع كامل ويؤكد على الست ام فوزية اطعامى جيدا

ويفاجأ ابى وهو يوصل الطبيب بفوزى المسكين وحالته مزرية من القلق








ويجلس معه فى المجلس وياتى ليخبرنى انه فى الخارج اه لو استطيع الخروج اليه

كيف اعلم انه هنا ولا اقدر على لقائه تبا لك يا جسدى المنهك تحبسنى بين جنباتك .....وتبعدنى عنه

وحين ياس فوزى من امكانية ان يرانى غادر ولكن وقف على باب منزلنا واتصل بى على محمولى

وحين رايت الرقم كاد قلبى يطييير فرحا واجبته محاولة ازالة الوهن عن صوتى و كانت بضع كلمات منه

حملت لى قلقه الشديد و..........حبه ورايت قول الشافعى يتجسد

مرض الحبيب فعدته ...............فمرضت من حذرى عليه

واتى الحبيب يعودنى ..................فبرئت من نظرى اليه

ما اجمل ان تشعر ان احدهم قلقا عليك يتمنى ان يصيبه ما اصابك كانت بضع كلمات ولكن .........كانو شفائى
و

تمر أيااااااااااااام


تزول وعكتى الصحية بالتدريج ويداوم فوزى على مكالمتى هاتفيا ليطمئن على صحتى ورفض القدوم

حتى اشفى تماما حتى لا يجهدنى الجلوس معه

اه لو يعلم كان اسبوع فقط لم اره فيه ولكنه كان على قلبى دهرا كاملا

اجلس امام المراة اعدل من وضعية حجابى فسيأتينى فوزى اليوم اخيييييييرا وانظر لوجهى الشاحب يارب

لا تجعلنى شاحبة فى عينيه

ويدق الجرس ويذهب ابى ليفتح و.........سمعت صوته العزيز يسلم على ابى ويدخل ويأتى ابى ليخبرنى

انه هنا ويطلب منى الخروج

احاول جاهدة ان اسيطر على قدماى وامنعهما من الذهاب ركضا للقائه واخيرا تتلاقى نظراتنا من جديد

ويقوم واقفا حين يرانى وتتجمد الكلمات فى حلقينا فقط ننظر لبعض بلهفة و...........نبتسم

اااا فوزية انا ...... ما هذا هل هذه كلمة افتتاحية ام ان اذناى لم تسمع جيدا

انا .......انا وهذه المرة كنت قد جلست وهو واقفا مع سيمفونية الانا العجيبة

واساله اخيرا انت ايه يا فوزى ؟؟

انا عايز اكتب الكتااااااااااب

اخر كلمة توقعت ان اسمعها من هذا الفوزى وفى اول مرة نتقابل فيها بعد مرضى واعتقدتنى

لم اسمع جيدا او ان اذناى تكذبان على فاجبت

نعم ؟؟

عايزة اكتب الكتاب يا فوزية عايز اجوزك يقولها بجرأة اكبر وانا.........

ثم اجبته وايضا باول كلمة خطرت على بالى

ليه

عشان عشان عشان اجى ازورك براحتى وكمان عشان لما تتعبى ابقا جمبك ويصمت قليلا بعد هذا ثم

الاسبوع ده كان صعب عليا اوى يا فوزية ارجوكى وافقى

جملته الاخيرة كانت حقا صادقة قالها بحزن اه لو تعلم كم مزقتنى هذه الكلمات

ويرانى فوزى صامته وشاردة فيحاول اخراجى من هذا قائلا

انا ......جيبتلك حاجه والان فقط انتبهت للصندوق الموضوع على الاض بجواره مغلف على هيئة هدية كبيرة

ويعطيه لى وافتحه لافاجأ بقفص به يمامتان من النوع القمرى صدرهما احمر وبغاية الوداعه

وانظر اليه من وسط ذهولى من كثرة مفاجاته فأراه يبتسم لى بخجل قائلا

اااصلى عارف انك تحبى الحيوانات وكمان الراجل قالى انهم بيبيضو و كنت هجيب سمكتين وبعدين ويصمت

كم جميل هذا الفوزى وهو مرتبك ينظر حوله ويبعثر نظراته بعيدا عنى حين شعر بى اتفحصه

ولاول مرة شعرت بأننى تواقة بصدق لان اكون زوجته ان كان كريما معى الى هذا الحد وانا

لازلت مخطوبته فقط فكيف سيكون اذا صرت زوجته

فى لحظة واحدة تزول كل اوهامى وتخيلاتى عن ما يمكن ان يحدث فى فترة العقد وشعرت فقط بانى .......اثق به

وطبعا اخذت القفص وشكرته بخجل وهو يغادر قلت له .......امتحاناتى بعد شهر بعد ما تخلص .......

ممكن .....تكلم بابا فى اللى قولتهولى النهاردة

ويغادر فوزى مذهوووولا من موافقتى يكاد يجن فرحا للدرجة التى نسى فيها ان يتمنى لي ليلة سعيدة

فقط ابتسامة من الودن للودن

وانشغل فى الايام التالية بالدراسة ثم الدراسة ويطلب والدى من فوزى الامتناع عن الزيارات

والاكتفاء بمكالمتين اسبوعيا

امتحاناتى بعد اسبوعين وعقدى بعد الامتحانات بأسبوع واحاول جاهدة ان اركز فى المزاكرة

و لان ابى كان صريحا حين اخبرنى بانى لو فشلت هذا العام فلن يتم الزواج

وطبعا كان مجرد تحذيرا محفزا من ابى ولكن هو يثق بأنى لست من محبى الفشل وحتى لو كنت فى حالة ...........حب

وتمر امتحاناتى لاول مرة سريعا فلا اكاد اشعر الا وهى تنتهى وكنت كلما تاقت نفسى لفوزى اذهب

لانظر لليمامتين كانتا صديقتاى فى فترة الامتحانات

وكنت اخذ فترات راحة قصيرة بين المزاكرة للاكل وايضا اقضيهما امام القفص وطبعا كل هذا

لم يغب عن عيون الست الوالدة

بلغنى ايها الملك السعيد ذو الرأى الرشيد ان الست فوزية..........
ــــــــــــــــــــــــــــــــــــــــــــــــــ ــــــــــــــــــــــــ
جالسة اتطلع للطائران الجميلان وتدخل امى لتقطع تأملى و.......شوف يا خويا البت يا بت ارحمى نفسك هتجننى كده

ومتظاهرة بأن شيئا لم يحدث ايه يا ماما بس انا عملت حاجة

تعالى يا بو فوزية شوف بنتك اللى هيجيلها حول من كتر البحلقة فى اليمام اللى واخد عقلك يا فافى

عموما هااانت باقى امتحان واحد بس عديه واحنا نجيب الماذون

اووووه لم يكن ينقصنى غير سيمفونية امى المحرجة هذه سأترك لها الحجرة واغادر

ولكن لماذا اجد نفسى عازفة عن الدراسة الان ويرن جرس الهاتف انها ريم صديقتى

ما تيجى تزاكرى معايا يا فافى انا كمان اتخنقت من المادة دى وهاين عليا مروحش اخر امتحان

وتروقنى الفكرة فصديقتى ريم تقطن فى الشارع المجاور واسأل امى فتوافق وارتدى ثيابى واغادر مسرعة

ووسط سرعتى تلك انسى حمل هاتفى معى

واعود الساعة العاشرة والنصف مساء فأجد امى قلقة الوجه واسألها خيييير

فتتردد امى فى اخبارى مما يزيد اعتقادى ان فى الامر سوء واخيرا تخبرنى

اصل فوزى اتصل على البيت وقلتله انك عند صاحبتك فاتصل على المحمول وانا شفت النمرة ورديت

قلتله انك نسيتيه فادايق

وطبعا انا لم يعني لى ما قالته امى شيئا واعتقدته قد انزعج لانى لم احدثه فقط ولكن اتصل مجددا

وهذه المرة اجبته وليتنى لم افعل

ايوة يا فوزية

اهلا يا فوزى ازيك

انتى كنتى فين ؟؟

انا بقولك ازيك وايه السؤال ده؟؟

يعنى يصح بنت ناس تقعد بره بيتها لحد عشرة ونص ومن غير ما تقول لخطيبها هى فين

نعم انا قلت لماما وهى كفاية اوى وانا كنت عند ريم يعنى هنا جمب البيت

طيب مكلمتنيش تقوليلى انك هتنزلى ليه وليه انتى اللى تروحيلها ما تجيلك هى

انا .......انا .......وبصوت تملئه الدموع انت مش من حقك تطلب منى اعمل اى حاجة ولا استئذنك حتى

ورميت السماعة وغادرت الى حجرتى واغلقت الباب وسمعت امى من الداخل تكمل المكالمة معه و تتشاجر معه ايضا

اكثر ما اغضبها انه تشاجر معى وانا امتحاناتى لم تنته بعد وختمت المكالمة معه قائلة والله ابوها

موجود لما يجى ليا كلام تانى معاك

ومن غرفتى استمع لكل هذا واتسائل كيف اننى كنت سعيدة واحلم فى الصباح وها انا الان...............اخلع الدبلة

لو كانت دبلتك هى طوق تخنقنى به وتفرض على بها ما افعل وما لا افعل فانى...........لا اريدها

و..............لا اريدك








اقوم لصلاة الفجر بعد ليلة مليئة بالدموع وبعد فشل محاولات امى فى جعلى اتناول العشاء معهم

كنت منهارة وفوق ذلك عندى امتحان بعد ساعات قليلة ولولا ذهابى للمزاكرة مع صديقتى ريم لما

اعتقدت انى قادرة على خوض الامتحان

هل هو الوداع.......... يارب ارجوك انا لن احتمل وتتساقط دموعى وانا اصلى يارب انى احبه

واشعر بالم شديد يسرى فى شراينى

اه يا قلبى الاحمق توقف عن ايلامى انت سبب كل هذا ان كبريائى يهان بسببك يا الله ارنى الحق حقا

امنحنى خطا صائبة

وانتهى من الصلاة فأجدنى اهدأ نفسا وقلبى تسكن الامه وابدا فى ارتداء ثيابى كعادتى ثم اجلس

واحاول ان اراجع شيئا من المادة قبل خروجى

وجلست على طرف سريرى وفتحت الملزمة و...اين قلمى اه ها هو بجوار المراة واهم لاخذه وفجأة .

........لمحتها شىء صغير يلمع

دبلتى العزيزة .......... وسقطت الملزمة من يدى وتسمرت مكانى وعاود قلبى الالم

وبلا مقدمات اخذتها وقبضت عليها بشدة وجلست فى الارض ابكى لا لن احتمل ان اخلعك من يدى

انتى قطعة من روحى فكيف ساحيا بدونك

ولكن لازالت الشجاعة لا تواتينى لارتديها فكبريائى لا زال مجروحا ماذا افعل ووسط بحر حيرتى ودموعى دخل ابى

لم يسعفنى الوقت لادارى دموعى او لانهض وفقط داريت وجهى بعيدا عنه انا اكره دائما ان يرى الناس

دموعى وخاصة ابى الحبيب وتجهم وجهه لرؤيتى بهذا الشكل لا حول ولا قوة الا بالله قومى يا فافى ليه العياط بس

اسفة يا بابا والله كنت ..... وينقطع صوتى فيقترب منى ابى الحبيب ويضمنى اليه

استعيذى بالله يا بنتى محصلش حاجه لكل ده فوزى زودها حبة بس انتى وامك زودتوها حبتين مينفعش كده

اصله شخط فيا يا بابا وانا معملتلوش حاجه انا ......... مش هتجوزه وانفتح فى البكاء مجددا

وللمرة الاولى اجد ابى ينظر لى بجدية وغضب ........ايه مش هتجوزيه يعنى ايه هو لعب عيال يا بنت

انا ربيتك مسؤلة عن قراراتك وعاقلة بس الجواز مفهوش تهريج وقام مغادرا الغرفة وقبل ذهابه

القى الى بكلمة اخيرة ولمحت فى عينيه شبح ابتسامة وهو يقول هو كل اللى بيحبو بيجننو

وكانت كلمته تلك هى كل ما فكرت فيه انا احبه فقط احبه ولن احتمل فقده

وبحركة واحدة كانت الدبلة تلمع فى بنصرى الايمن كيف دخلت لا ادرى هى فقط عادت لمكانها الصحيح

وذهبت لامتحانى وانا اشعر بروحى تتعافى من دموعها وطوال الطريق انظر لدبلتى الحبيبة انا.........لن اخلعك مجددا

ومر الامتحان وعدت سريييعا الى البيت وكان الحمد لله امتحانا بسيطا لولا صورة فوزى التى كانت

تنطبع على الورقة كل لحظة

وما ان وصلت حتى كان كل همى ان اعرف ان كان اتصل ليطمئن على ادائى فى المادة ولكن ..........لم يتصل

وتلمح امى الدبلة فى يدى بعد ان رأتنى القيها امس فتنفست الصعداء ولكن هى ايضا قلقة من عدم اتصاله

ومر اليوم وانا اشاور نفسى هل اطلبه ام ........انتظر وفى المساء قررت ان اسال امى فان وافقت طلبته وكان جوابها

نااااااااااعم تكلميه ليه هو انتى غلطتى لااااا ده هو اللى يتصل ويجى يتاسف على النكد اللى عمله على الفاضى

ولم الح فى سؤالى حتى لا اسمع من كلمات امى ما يزيد الامر على نفسى سوء فانسحبت الى غرفتى حزينة

تتلاعبنى الافكار السود

وعندما عاد ابى وجدته يسال امى هامسا لئلا اسمعه هل اتصل وحين اجابته امى نافية نظر الى الارض

وغادر الى غرفته فى صمت

هل الامور تتطور هكذا هل سيتركنى فوزى نظرات ابى تحمل هذا المعنى وافتح خزانتى

اطالع فستان الخطوبة هل لازال موجودا

لماذا اشعر الان انى كنت احيا حلما ورديا وان لى الان ان استيقظ على هذا الكابوس واخرج

البوم الصور افتش ............عنه

عينيه تضحكان فى الصورة وروحى تبتسم هل هذا كله مزيف ...........اغلقت الالبوم والقيت به بعيدا كذب كل هذا كذب

انتظر اول بادرة خلاف ليحطم قلبى بقسوته وفى لحظة وجدتنى عاجزة ......عن كل شىء حتى عن البكاء

ومر ثلاثة ايام ولا جديد وكل يوم يزداد يقينى انه كان طيف اتانى فى ليلة نورانية ووهبنى اجمل

لحظات الحياة وغادرنى بغير وداع

يا طيفه ...........اخبره بان الذكرى تقتلنى ...........يا طيفه ابقى معى ان كان صاحبك راحلا عنى للابد

وطبعا يحاول ابى وامى الا يتحدثا فى الموضوع امامى فصمتى وسكونى يقلقهما على كثيرا ويخافان

من ان اكون على حافة الانهيار

وفى اليوم الرابع بعد صلاة العصر يدق بابنا ......ضيف

قام ابى ليفتح وانا فى غرفتى ارتب مكتبى من كتب الدراسة و.......سمعته

ترحيب ابى المتفاجىء وصوت فوزى ضعيفا باهتنا وهو يسلم وانا تحولت الى تمثال شمعى متسمرة

فى مكانى اتسائل هل احلم ؟؟

و تدخل امى مشرقة عارفة مين جه يا فافى ........مين يا ماما

وطبعا لا يخفى حالى على امى هى علمت بالتاكيد انى اعرف انه هو نظراتها تخبرنى بذلك

يالا مستنية ايييه قومى البسى وابوكى هيناديكى واقوم لاستعد ولا ادرى ماذا ارتديت ولا كيف

وكانت المرة الثانية التى اشعر بأن ما يفصلنى عنه .....جدار

ويأتى ابى الى غرفتى قائلا يا بنتى هو اعتذر وانا كمان اعتذرت عن والدتك وانتى لازم تتاسفى

انك سيبتى السماعة وكلمتيه بطريقة متصحش

حاضر يا بابا وسعد ابى كثيرا حين اتى الى فوجدنى ارتدى ثيابى واحرجتنى ابتسامته الصامتة .

.......نعم يا ابى انا اكاد اطير شوقا للقائه

واخرج اخييييرا اليه ولا ادرى لماذا لم استطع ان ارفع عينى اليه لا استطيع واسلم بصوت

منخفض فيرد تحيتى بصوت ضعيف ايضا وابى واقف يراقبنا و........

بغير ارادة منى ارفع عينى اليه وتاهت منى كلماتى ولم اجد سوى الدموع تسيل منى غزيرة ولا املك ايقافها

يا فرحة لقائه ويا قسوته لتركى ثلاثة ايام كاملة

ويضطرب ابى من رؤية دموعى ويغادر بهدوء وينادينى فوزى .......فافى بلاش عياط

انا ............اسف ارجوكى بلاش تعيطى وكلما طالبنى بالتوقف كلما ازددت بكاء

ازاى قدرت ......تزعق فيا .......وكمان تسيبنى ......ومتتصلش

انا اسف ...... انا كنت فاكرك هتفسخى الخطوبة وكنت ..........و ......خايف اجى

ومن وسط دموعى انظر اليه يا الله هل هذه التى فى عينيه دموع؟؟ ام انها دموعى انا هل اتوهم

ويقترب ليجلس امامى مباشرة والان اتأكد انها دموع واطالع وجهه فاجده شاحبا مجهدا

اه يا خليل الروح هل عانيت مثلى توقفت دموعى وانا انظر فى عينيه وتوقفت عقارب الساعة فى زمنى

انظر اليه برموش مبللة بالدموع واحمل له نظرة واحدة ............لا تتركنى مجددا

وفى محاولة منه لابعاد الحزن عنى قال لا تبكى فأنتى ............عروسى

وتسللت ابتسامته الخجلى وانا ايضا ابتسمت .......هل لا زلت تقبليننى ..وبلا تردد اجابته عيناى ........نعم

------------------------------
لنا عودة قريبة باذن الله